Ini llan ur llin, ggudin maca ttusdersen, amm waman n lmarur !  eg ammi i trid ten ed tamzêd  cceden ak ger ifassen zund igidu! Teddert ammas nnsen, ku yass, ku tassaât. ccaren ak d twirga, s yissen a s da tssilyt ar tzugguzed unfus. Lhâlt nnsen da tessla izêran, tarw ak ed imuxyad d unezmum. Tamara nnsen ur tli tikwla, ar ek tberrey. GHas add yali yan ifilu n usidd, kejmen aghwlaf nnsen, ttemren digs amm uselghigh, negh uckan dat wallen nnek, amm irugga, amm twargit igufen, Iwa rwel amêz ten ed, mzallaàn s âenwa zund tiwili yesduy wuccen. Tafed ighef nnek ghas key, ammas n ukabar war isem, ur ilin taghzi ula tirut, ammas n imdanen war izûran, mi teccarêd tudert, mi teccared aslix.

Tughaled ghursen, wan yan umudîn, wan yan uldgig inettûn, tgid aberrani amm tudert nnsen, axlawiy amm wafa n Rêbbi kkasen ed wayd wamek, milli zâr sen s ttawil! sawl asen xef tmara nnsen, xef wukkuf nnsen, ar zârk sxuzzuren. Ayenna trid teqqised asent, yuf ghursen is iwghen i yneqqiben n wafa izelfen ula yak sellan ; Huz iwaliwen nnek ad asen kejmen anelli, ad ak ed inin, tuf asen lmut g unezmum d tixat. han ad asen tsiwled xef umezruy; hat irêzag asen g imawen, ammi  da teccancafed aâttib aqbur, yagin ad ijjey , d inemruruyen ur ittesmuren.

Siwel asen xef tghawsiwin trid. maca ekk asen ttêrf nitni ! haten ar ak ferrun, ar ssefrun, awin awal, awin ed awal, tighild id nniyt, tighild is ka ur ten yagh, telha ghursen tudert, d iberriân ixataren ! ighilen is da ddern tudert nnsen, zzigh da ti meddêln ! adday tmmectegd a ed tasid awal izan izêman, waxxa iga ghas awal, mmesxuzzuren gerasen, grin dik yan uraâa isdûren aman g ifadden, bbin lhîst , mraàan, ssilin dik allen sugzen tent inin ak : fkagh s ttisaà dat agh, ddu ad ad tseksud ma ghef tekkated aqellal nnagh nnek! Tafêd digh ixf nnek ghas key, iwa haggwem mantur ikkat unzâr, ad iffegh waggu geratun .

Amata degsen hêtigh t, llan winna yallan xef tudert nnsen ar « kkaten herribu » ; llan winna an winna ittelqqafen iman wahli aya. llan winna yesmàicen amm lmàarif qqimin g tama n umezruy, llan ayt bbux d ayt uxlul, llan winna en tuwd tmara ighsan gen tigelliwin, mi yttuyakkas wuddur d zzaxt, llan winna ybêrrmen ar tedên ixfawen nnesn, sddullun tarwa nnsen, llan winna ysawalen amm ddendum ar ceghlacan awin ak ed iriran, Ilan winna yessenfayen s yan uzênzar igezzulen mec t sagzen iffegh ed ixf amejjud is t hezzan fghen ed idâren, llan winna mi yucka negh yemmunedyils ar shurran s ka n wawal ifemzen issenganixfawen, llan winna yttecfan digh g buccidân iddegh akufen g izûran, llan digh winna yak ittinin gan imusnawen negh Imeksawen ihêdan tiwili ur igin tinsen ar sgidiyen aggu amm icehlafen, Ilan Winna yegran tarwa nnsen s ammas n ubedduz n terfa. Ilan winna yerrzan g tmizar nnsen rewlen i tmeqqa aghen en amda...

Ilan digh, maca ur àtin winna yessidiren asirem, amzên s twirga wargen, ar tteqlen mantur itteffegh waggu tizi ad ddun, winna ghur tuf Imut tudert n ddaw ufus, winna Ygennun icerrigen nnsen, ar jujjuyen itersan nnsen. winna ghur têhla tarwa nnesn, winna yetnadan asafar i yàedban nnsen, winna mi qqeflallin yiman nnesn, winna mi suddumen s idammen wulawen nnesn. winna mi yucka unuddem g wussan nnesn, winna mi yga wawal d idles tawuri nnsen, winna yettinin mayd ukzen, winna yumzên s izûran nnsen. winna yetnaghan d wattân ixwlan tisutiwin g warraw nnsen, winna tesmmuri ddelt yaghen akal nnsen, winna yetteddun s yîd ddun s wazal ddun g unzâr d ideflawen af ad ed raren aman s asif nnsen...

Iwa may ttukzem g umesnay-a ! ghas s ttawil han ka yettawin azzaz, azzaz s awal negh tala ! abrid nna tram tekkim t, ku tixsi tugel s adar nnes. awd tawda hat tumêz s bab nnes ! ayddegh ay ed illan, iwa mnuyat udmawen nnun iferghen amm ighenjiwen ! mmumyat negh tebàezqem ! kkesat taghamut negh ad awen gin lemdawid gren awen tibardiwin, awin kwen s amzil ad awen iheyya tisila ! kkesat aghewrc illan dat wawal ! uduyat xla g îd « iwa hatin », « awddi hat ghas » , « iwa dghi. »,  mec ur tessinem ad awen t inigh : han ddelt nnewn tesguttâ.

M.ag mellal.