Ayyuz nk a 3aziz tmqqurt aylligh tsult, tmqqurt aylligh tmmut. Tgit amazigh ur jju t tssntlt. Amarir mqqurn ur a ittmtat. Sunfu a dadda tmqqurt tugrtn akw, ur jju d kiyyin ad innan tgit aylli ur tgit. Ur jju d kiyyin ad issugan idamn n tmazight gh izuran nk. Ssngh k gh ddawas n imdla n Bariz, ismDan ssismiDn akw ixsan n ayt darngh, kiyyin igiwr nk rghan ur ngaran d tafukt n darngh.
3aziz sunfu, Tafukt sunfu kmmin ad ikfan iznzarn, kmmin ad igan iznzarn. Tafukt kmmin ad tn issrghan sawln tamazight gh umarg ula gh unwal, tamazight igh gwmrn iwaliwn, aZawan ngh akw islman. 3aziz sunfu ssngh, nssn akw, nkwni yan mnnaw wazzan n TZat tmrwin, is tughd twada nk , tawada nk tin t tmazight tgt as yan gh wida yas isfaskan. Tawada nk tughd tssn ukan mani twats, ur jju tgit gh wid yas yunfn wida issntaln udmawn nsn. Tawada nk tin tmazight tga agharas yan ur jju t tssudit afad ad tlkmt iwttasn. Ur jju t tzznzit i ibrghazn lli yangh izznzan i wiyyaD. Willi d willi d tilli d tilli. Sunfu a dadda tamazight ur d is as t ka ttirirt, ur d is ast ka ttlqqamt tga yak : awal akal afgan... ur d aghar gh iDuDan mac gh idamn, tamazight tut ak s iZuRan gh iZuRan.
3aziz gh mzzi nw d win inggwa nu tssimimt agh Bl3id zik s ugrD nk iZiln, iZlin. Mad naZum aZumn wiyyaD awal, yawi tn ungi n NaSr d Lhusayn d M3mmar, kiyyin tccit azal trgha, ur taZumt awal, tnnit tgit gh tuZZumt n wass A M A Z I GH wiyyad rkwsn gh tguri d nnig n tguri d ddawas n tguri, illa yakw gisn mad innan gan aylli ur gan.
Inna yan urgaz mqqurn idda ghd nttan, icca wakal taghssa ns, mac sul iwaliwn ns rad tn addrant tasutin i tiyyaD : Midn ugwin ad akw aDn ghmk lli tuDnt. TamaDunt f isawl tmmim, idrus mad st imDin tmmim as. Kiyyin tgi tst d uZllay tagwltst gh umggrD ad st iZr kuyyan.
Dadda sunfu, amarg nk rad imun d tudrt n tarwa n darngh, istis n darngh. Rad asn yig tisnt i wawal, rad kkatn gratsn s uSllab n Liqqamt, rad asn yimim umarg azaykku lli mmi tulst. Tugga rad sul tili ar afud Bl3id rad yilkm l3zib lli jju ur ilkm, taraxut rad taf aduku ns ijlan gh umlal n Sidi Wassay.
3aziz han ur tmmut amarir n tidt ur a ittmtat
3aziz tmqqurt ur tmmut ixsan kad ikccmn akal
Tanmirt 3aziz tkfit ur d imik, ur jju n tgit tinzar nk gh ignwan tsrst bdda iDarn nk s wakal
Tanmirt amarg nk iga yagh asmun.
Tanmirt tmlit agh Bl3id ur t akw yad lli nssn igllin.
Tanmirt tmlit agh Traxut, yat tmghart irZan iskraf n tghwwaght.
Ayyuz nk tssnt mad tgit, ur t jju tssntlt,
Ayyuz nk ur jju tettut tamazirt lli gh d i tlult.
Les commentaires : Important :Prière de noter que les commentaires des lecteurs
représentent les points de vue de leur auteurs et non pas d’AmazighWorld; et
doivent respecter la déontologie,
ne pas dépasser 6 à 10 lignes,
critiquer les idées et non pas les personnes, êtres constructifs et non déstructifs et dans le vif du sujet.
